യുക്മ ദേശീയ - റീജിയണല് കമ്മറ്റികളുടെയും അംഗ അസോസിയേഷനുകളുടെയും പ്രവര്ത്തനങ്ങള്ക്കുള്ള ധനസമാഹരണാര്ത്ഥം യുക്മ ദേശീയ കമ്മറ്റി അവതരിപ്പിക്കുന്ന മൂന്നാമത് യു-ഗ്രാന്റ് സമ്മാന പദ്ധതിയുടെ നറുക്കെടുപ്പ് ഫെബ്രുവരി ഒന്ന് ശനിയാഴ്ച നടക്കും. ലണ്ടനില് വച്ച് സംഘടിപ്പിക്കുന്ന ബഹുജന പരിപാടിയുടെ ഭാഗമായിട്ടായിരിക്കും നറുക്കെടുപ്പ്.
യുക്മ ദേശീയ കലാമേള വേദിയില് വച്ച് നറുക്കെടുപ്പ് നടത്തുവാന് സാധിക്കുന്ന വിധമായിരുന്നു യു-ഗ്രാന്റ് 2019 വിഭാവനം ചെയ്തിരുന്നത്. എന്നാല് വിറ്റഴിഞ്ഞ ടിക്കറ്റുകളുടെ കൗണ്ടര് ഫോയിലുകളും വിറ്റഴിയാത്ത ടിക്കറ്റുകളും നിശ്ചയിച്ച സമയപരിധിക്കുള്ളില് റീജിയണുകളില്നിന്നും തിരികെ ലഭിക്കാതെ വന്നതിനാലാണ് നറുക്കെടുപ്പ് മാറ്റിവക്കേണ്ടി വന്നത്.
പത്തു പൗണ്ട് വിലയുള്ള ഒരു ടിക്കറ്റ് എടുക്കുന്ന വ്യക്തിക്ക് പതിനായിരത്തോളം പൗണ്ട് വിലമതിക്കുന്ന ഒരു ബ്രാന്ഡ് ന്യൂ Peugeot 108 കാര് സമ്മാനമായി നേടാന് അവസരമൊരുങ്ങുന്നു എന്നതുതന്നെയാണ് യു- ഗ്രാന്റ് - 2019 ന്റെ മുഖ്യ ആകര്ഷണം. കൂടാതെ രണ്ടാം സമ്മാനം ലഭിക്കുന്ന വിജയിക്ക് ഇരുപത്തിനാല് ഗ്രാമിന്റെ സ്വര്ണ നാണയങ്ങളും, മൂന്നാം സമ്മാനാര്ഹന് പതിനാറ് ഗ്രാമിന്റെ സ്വര്ണ്ണ നാണയങ്ങളും നല്കപ്പെടുന്നു.
ഒരു പവന് വീതം തൂക്കം വരുന്ന പതിനാറ് സ്വര്ണ്ണ നാണയങ്ങള് ആണ് നാലാം സമ്മാനമായി പ്രഖ്യാപിച്ചിരിക്കുന്നത്. യുക്മയുടെ ഓരോ റീജിയണുകള്ക്കും രണ്ട് വീതം സ്വര്ണ്ണ നാണയങ്ങള് ഉറപ്പായും ലഭിക്കുന്ന വിധമാണ് നാലാം സമ്മാനത്തിന്റെ നറുക്കെടുപ്പ് നടത്തപ്പെടുന്നത്. മുന് വര്ഷങ്ങളിലേതുപോലെതന്നെ യു കെ യിലെ പ്രമുഖ മലയാളി ബിസിനസ് സംരംഭകരായ അലൈഡ് മോര്ട്ട്ഗേജ് സര്വീസസ് ആണ് യുക്മ യു- ഗ്രാന്റ്-2919 ന്റെ സമ്മാനങ്ങള് എല്ലാം സ്പോണ്സര് ചെയ്തിരിക്കുന്നത്.
ലോട്ടറികളുടെ ചരിത്രത്തില് ഒരുപക്ഷേ ആദ്യമായിട്ടാകും വിറ്റുവരവിന്റെ പകുതി തുക വില്ക്കുന്നവര്ക്ക് വീതിച്ചു നല്കുന്ന വിപുലമായ വാഗ്ദാനം നടപ്പിലാക്കുന്നത്. യുക്മ യു- ഗ്രാന്റ് -2019 ലെ വില്ക്കുന്ന ടിക്കറ്റുകളുടെ മൊത്തം വിറ്റുവരവിന്റെ അമ്പതു ശതമാനം പ്രസ്തുത റീജിയണും അസോസിയേഷനുകള്ക്കുമായി വീതിച്ചു നല്കുകയാണ് യുക്മ.
യു കെ മലയാളികള്ക്കിടയില് മറ്റൊരു വലിയ ഭാഗ്യശാലിയെ കണ്ടെത്തുവാനുള്ള അസുലഭ അവസരമാണ് യു- ഗ്രാന്റ് നറുക്കെടുപ്പിലൂടെ യുക്മ ഒരുക്കിയിരിക്കുന്നത്. 2017 ല് ഷെഫീല്ഡില് നിന്നുമുള്ള സിബി മാനുവല് ആയിരുന്നു യു-ഗ്രാന്റ് ലോട്ടറി ഒന്നാം സമ്മാനമായ ബ്രാന്ഡ് ന്യൂ വോള്ക്സ്വാഗണ് പോളോ കാര് സമ്മാനമായി നേടിയത്. 2018 ല് ബര്മിംഗ്ഹാം നിവാസിയായ സി എസ് മിത്രന് ഒന്നാം സമ്മാനമായ ടൊയോട്ട ഐഗോ കാര് സ്വന്തമാക്കി. ഈ വര്ഷത്തെ ബ്രാന്ഡ് ന്യൂ Peugeot 108 കാര് സമ്മാനമായി നേടുന്ന ഭാഗ്യശാലി ആരെന്നറിയാന് ഫെബ്രുവരി ഒന്നുവരെ കാത്തിരുന്നാല് മതിയാകും.
സമ്മാനങ്ങളുടെ എണ്ണത്തില് ഉണ്ടായിട്ടുള്ള വര്ദ്ധനവ് യു-ഗ്രാന്റ് നറുക്കെടുപ്പിന് ഈ വര്ഷം കൂടുതല് ആവേശകരമായ പ്രതികരണം ആണ് ഉണ്ടാക്കിയിരിക്കുന്നത്. നറുക്കെടുപ്പ് നീട്ടിവച്ച സാഹചര്യത്തില്, പല റീജിയണുകളുടെയും അംഗ അസ്സോസിയേഷനുകളുടെയും അഭ്യര്ത്ഥന പരിഗണിച്ച്, നിബന്ധനകള്ക്ക് വിധേയമായി, ടിക്കറ്റുകള് ലഭ്യമാണ്. കൂടുതല് വിവരങ്ങള്ക്ക് യുക്മ ദേശീയ പ്രസിഡന്റ് മനോജ്കുമാര് പിള്ള (07960357679), ജനറല് സെക്രട്ടറി അലക്സ് വര്ഗീസ് (07985641921), ട്രഷറര് അനീഷ് ജോണ് (07916123248), വൈസ് പ്രസിഡന്റ് അഡ്വ.എബി സെബാസ്റ്റ്യന് (07702862186) തുടങ്ങിയവരെയോ, റീജിയണല് പ്രസിഡന്റ്, സെക്രട്ടറി എന്നിവരെയോ ബന്ധപ്പെടേണ്ടതാണ്.
യു- ഗ്രാന്റ് ലോട്ടറിയുടെ മൊത്തം വിറ്റുവരവിന്റെ നിശ്ചിത ശതമാനം യുക്മയുടെ ചാരിറ്റി പ്രവര്ത്തനങ്ങള്ക്ക് വേണ്ടിയായിരിക്കും വിനിയോഗിക്കുക. യു-ഗ്രാന്റ് ടിക്കറ്റ് വില്പ്പന നടക്കാതെപോയ അസോസിയേഷനുകളുടെ ക്രിസ്തുമസ്-നവവത്സര ആഘോഷങ്ങളോടനുബന്ധിച്ച് ജനുവരി പകുതിയോടെ വില്പ്പന സമാപിക്കുന്നതാണ്. ഈ വര്ഷം ഏറ്റവും കൂടുതല് ടിക്കറ്റുകള് വില്ക്കുന്ന റീജിയണും, അസോസിയേഷനും പ്രോത്സാഹനമായി പ്രത്യേക ക്യാഷ് അവാര്ഡുകള് ഉണ്ടായിരിക്കുന്നതാണ്.